Marathi Kavita हंबरून वासराले चाटती जवा गाय

गुरूवार, 9 मे 2024 (15:49 IST)
हंबरून वासराले
चाटती जवा गाय
तवा मले तिच्यामंदी 
दिसती माझी माय
 
आया बाया सांगत व्हत्या 
व्होतो जवा तान्हा
दुष्काळात मायेच्या माजे
आटला व्हाता पान्हा
पिठामंदी पाणी टाकून 
पाजत जाय
तवा मले पिठामंदी 
दिसती माझी माय
 
कान्याकाट्या येचायला 
माय जाई रानी
पायात नसे वहान तिच्या 
फिरे अनवाणी
काट्याकुट्यालाही तिचं 
मानत नसे पाय
तवा मले काट्यामंदी 
दिसती माझी माय
 
बाप माझा रोज लावी 
मायच्या मागं टुमनं
बास झालं शिक्षान आता 
घेऊदी हाती कामं
शिकून श्यानं कुठं मोठा
मास्तर होणार हाय
तवा मले मास्तरमंदी 
दिसती माझी माय
 
दारू पिऊन मायेला मारी 
जवा माझा बाप
दारू पिऊन माये मारी जवा माझा बाप
थर थर कापे आन 
लागे तिले धाप
कसायाच्या दावनीला
बांधली जसी गाय
तवा मले गायीमंदी 
दिसती माझी माय
 
बोलता बोलता येकदा
तिच्या डोळा आलं पानी
सांग म्हणे राजा तुझी
कवा दिसलं रानी
भरल्या डोळ्यान
भरल्या डोळ्यान कवा पाहीन 
दुधावरची साय
तवा मले सायीमंदी 
दिसती माझी माय
 
म्हणून म्हणतो आनंदानं 
भरावी तुझी वटी
पुन्हा येकदा जन्म घ्यावा
माये तुजे पोटी
तुझ्या चरनी ठेवून माया
धरावं तुझं पाय
तवा मले पायामंदी
दिसती माझी माय
 
कवी - स. द. पाचपोळ

वेबदुनिया वर वाचा

संबंधित माहिती

नक्की वाचा

स्वर्ग आणि नरक खरंच असतात का? जाणून घ्या सत्य

Wheat Storage Tips: अशा प्रकारे साठवा गहू; वर्षभर सुरक्षित राहील एकही कीड लागणार नाही

What is Box Breathing फक्त ४ सेकंदात मिळवा मानसिक शांती: जाणून घ्या बॉक्स ब्रीदिंगची जादू

एप्रिल ते जूनच्या सुट्ट्यांमध्ये भारतातील या अद्भुत सणांना आवर्जून भेट द्या; ज्यामुळे तुमची सहल अविस्मरणीय ठरेल

Salt vastu remedies घरात लोक सतत आजारी पडत असतील तर एकदा हे नक्की करुन बघा

नवीन

Beauty Tips :चमकदार आणि डागरहित त्वचेसाठी चारकोल फेस मास्क बनवा

पोटदुखी या 5 गंभीर समस्या होऊ शकतात

Benefites of Shalabhasana :शलभासन योगाचे फायदे जाणून घ्या

लघु कथा : खरी मित्रता

पुरणपोळी: इतिहास, परंपरा आणि सांस्कृतिक प्रवास