WD |
आया, बाया, सासवांनो,
सांगू नका नाव घ्यायला
मी मॉर्डन बायको त्यांची
उखाणा नाही येत मला
कुंकवापेक्षा सोपी टिकली
साडी नको जिन्स-कुर्ती चांगली
उगा उडवू नका तुम्ही मला
मी शॉपिंगला चालली
मी नाही लाजरी बुजरी
मी स्मार्ट सुनबाई सासरी
मी भीत नाही कोणाला घरी
'सुपर वुमन'मी आजची नारी
स्वयंपाकाचा मला कंटाळा भारी
बोअर वाटते भाजीपोळी
पिझ्झा, बर्गरची लज्जत न्यारी
हॉटेलची हौस करतात हेच पुरी
म्युझिक, डान्स, मौज, मस्ती
टिव्ही, सिनेमाशी पक्की दोस्ती
मोबाईल माझा सखासोबती
नका करू नाव घेण्याची सक्ती
पार्लरची मी करते वारी
फॅशनची मला आवड भारी
या नखर्यावर खुश त्यांची स्वारी
मग का उगा नाव घेण्याची बेजारी?
समसमान आम्ही दोघेजण
ते राजा अन् मी राणी
मीही खूप पैसा कमावते
कशाला गाऊ त्यांच्या नावाची गाणी?