न जाणे न येणे कुठे चालले मी
कळे तू पुढे आणि मी मागुती
असे सांगत 'युगामागुनि चालली रे युगे' पृथ्वी पुढे चाललीच आहे. स्वतःभोवती फिरता फिरता त्या 'तेजोनिधी' भोवतीही फिरत प्रेमाची याचना करते आहे. प्रेमगीत गुणगुणते आहे. कित्येक वर्षे हे चक्र चालले आहे. यापुढेही कित्येक वर्षे चालत रहाणार आहे. रोज नवा दिवस उगवतो नि मावळतो. दिवस सरतात, महिने सरतात नि वर्षेही सरतात. कॅलेंडरची पाने मागे टाकली जातात. नवी कॅलेंडरे येतात नि जातात. निसर्गाला आकड्यांच्या कोंदणात बसवून हे सारे चालले आहे. आताही 2014 हे वर्ष सरले आहे. नि उद्या सकाळी नवे 2015 हे वर्ष उगवेल.