PAK vs AUS: पाकिस्तानने शेवटची वनडे आठ गडी राखून जिंकली,ऑस्ट्रेलियाचा दारुण पराभव

तिसऱ्या आणि निर्णायक एकदिवसीय सामन्यात पाकिस्तानने ऑस्ट्रेलियाचा आठ गडी राखून पराभव केला आहे. यासह मोहम्मद रिझवानच्या नेतृत्वाखालील संघाने तीन सामन्यांची वनडे मालिका 2-1 ने जिंकली. पाकिस्तान संघाने नाणेफेक जिंकून प्रथम गोलंदाजी करण्याचा निर्णय घेतला.

प्रथम फलंदाजी करताना ऑस्ट्रेलियन संघ 31.5 षटकांत 140 धावा करून सर्वबाद झाला. शॉन ॲबॉटने सर्वाधिक 30 धावा केल्या. शाहीन आफ्रिदी आणि नसीम शाह यांनी प्रत्येकी तीन विकेट घेतल्या. प्रत्युत्तरात पाकिस्तान संघाने 26.5 षटकांत दोन गडी गमावून लक्ष्य गाठले. सॅम अयुबने सर्वाधिक 42 धावा केल्या.

पाकिस्तानने २२ वर्षांनंतर ऑस्ट्रेलियाचा मायदेशात द्विपक्षीय वनडे मालिकेत पराभव केला आहे. यापूर्वी पाकिस्तान संघाने 2002 मध्ये ऑस्ट्रेलियाविरुद्ध द्विपक्षीय वनडे मालिका 2-1 ने जिंकली होती. ऑस्ट्रेलियाने पहिला एकदिवसीय सामना दोन गडी राखून जिंकला होता. तर, पाकिस्तानने दुसरी वनडे नऊ विकेट्सने जिंकली. तिसरा एकदिवसीय सामना पाकिस्तानने आठ गडी राखून जिंकला. आता 14 नोव्हेंबरपासून दोन्ही संघांमध्ये तीन सामन्यांची टी-20 मालिका खेळवली जाणार आहे.

प्रथम फलंदाजी करताना ऑस्ट्रेलियाने 140 धावा केल्या. संघाच्या सहा फलंदाजांना दुहेरी आकडाही गाठता आला नाही.

प्रत्युत्तरात पाकिस्तानची सलामी पुन्हा एकदा चांगली झाली. सॅम अयुब आणि अब्दुल्ला शफीक यांनी 84 धावांची सलामी दिली. शफिक 53 चेंडूत 37 धावा करून बाद झाला तर सॅम अयुब 52 चेंडूत चार चौकार आणि एक षटकाराच्या मदतीने 42 धावा करून बाद झाला.

बाबर आझम 28 धावांवर आणि मोहम्मद रिझवान 30 धावांवर नाबाद राहिला. बाबरने आपल्या डावात चार चौकार मारले, तर रिझवानने एक चौकार आणि दोन षटकार मारले. या दोघांनी 58 धावांची नाबाद भागीदारी करत संघाला विजयापर्यंत नेले.

Edited By - Priya Dixit