करोनासंदर्भातील माहिती आणि लिंक असल्याचे सांगून अनेक स्मार्टफोनमधून सर्बेरस (Cerberus) या ट्रोजनच्या माध्यमातून खासगी माहिती चोरली जात आहे. तसेच फिशींग (phishing) प्रकारच्या सायबर हल्ल्याच्या माध्यमातून आर्थिक लूट केली जाते आहे. यासंदर्भातील इशारा सीबीआयने जारी केला आहे. सीबीआयने दिलेल्या माहितीनुसार, इंटरपोलने दिलेल्या माहितीच्या आधारे अलर्ट जारी करण्यात आल्याचे म्हटले आहे.
करोनामुळे जगभरामध्ये दहशत पसरल्याचा फायदा घेतला जात असून करोनासंदर्भात माहिती जाणून घेण्यासाठी ट्रेण्डचा गैरफायदा घेत आर्थिक फसवणूक करण्याच्या उद्देशातून सर्बेरसचा वापर केला जात आहे. सर्बेरसच्या माध्यमातून करोना संदर्भात अधिक माहिती जाणून घेण्याचे मेसेज यूजर्सला पाठवले जातात. करोनासंदर्भातील महत्वाची माहिती असल्याचे भासवून अधिक वाचण्यासाठी लिंकवर क्लिक करण्यास सांगितले जाते. आणखी लिंकवर क्लिक करताच ट्रोजन स्मार्टफोनमध्ये इन्सॉटल होतो.
