क्वालिफायर-2 मध्ये गुजरात टायटन्स आणि मुंबई इंडियन्सचे संघ आमनेसामने आले होते. अहमदाबादच्या नरेंद्र मोदी स्टेडियमवर पावसामुळे टॉसला 45 मिनिटे उशीर झाला. मुंबईचा कर्णधार रोहित शर्माने नाणेफेक जिंकून प्रथम गोलंदाजी करण्याचा निर्णय घेतला. गुजरातकडून शुभमन गिल आणि रिद्धिमान साहा यांनी डावाची सुरुवात केली. डावाच्या दुसऱ्या षटकातच शुभमनने मोठी कामगिरी केली.
शुभमन गिल हंगामात सर्वाधिक धावा करणारा खेळाडू ठरला. त्याने ऑरेंज कॅप ताब्यात घेतली. सर्वाधिक धावा करण्याच्या बाबतीत गिलने रॉयल चॅलेंजर्स बंगळुरूचा कर्णधार फाफ डुप्लेसिसला मागे सोडले. डुप्लेसिसने 14 सामन्यांच्या 14 डावात 730 धावा केल्या. त्याने आठ अर्धशतके झळकावली. डुप्लेसिसची सरासरी 56.15 आणि स्ट्राइक रेट 153.68 होता.
शुभमन गिलने मुंबईविरुद्ध 129 धावा केल्या. त्याने 60 चेंडूंच्या खेळीत सात चौकार आणि 10 षटकार मारले. गिलचे हे चार सामन्यातील तिसरे शतक आहे. साखळी फेरीतील शेवटच्या दोन सामन्यांमध्ये त्याने सनरायझर्स हैदराबाद आणि रॉयल चॅलेंजर्स बंगळुरूविरुद्ध शतके झळकावली. गिलशिवाय साई सुदर्शनने 31 चेंडूत 43 धावा केल्या.
