जवळपास 10 वर्षांपूर्वी बॉलीवूडमध्ये पदार्पण केलेली अभिनेत्री दीपिका पादुकोण आज यशाच्या शिखरावर पोहचली आहे. एकापाठोपाठ एक अशा तिच्या सात चित्रपटांनी बॉक्स ऑफिसवर कमाईत 100 कोटींचा आकडा पार केला. राम-लीला, बाजीराव मस्तानी, ये जवानी है दिवानी आणि पद्मावत अशा दमदार चित्रपटांमध्ये ती मुख्य भूमिकेत झळकली.
स्वत:च्या मेहनतीच्या जोरावर हे यश मिळवतानाच तिला काही अपयशसुद्धा पचवावे लागले. अशाच एका अपयशाचा तिला आजही पश्चाताप होतो. अभिनेत्री नेहा धुपियाच्या चॅट शोमध्ये दीपिकाने तिच्या बहिणीसोबत हजेरी लावली होती. यावेळी तिने मनमोकळेपणाने गप्पाही मारल्या आणि काही खुलासेसुद्धा केले. करिअरमधला एक असा चित्रपट ज्याची ऑफर स्वीकारल्याचा आजही तिला पश्चाताप होतो याबद्दल दीपिका बोलत होती आणि तो चित्रपट होता चांदनी चौक टू चाइना.
या शोमध्ये नेहासोबत साधलेल्या संवादातून दीपिका आणि कतरिनामधील शीतयुद्ध अजूनही संपलेलं नसल्याचं चित्र दिसून आलं. नेहाने जेव्हा तिला विचारले की तुझ्या लग्नाला कतरिना कैफला आमंत्रित करशील का? तेव्हा क्षणाचाही विलंब न करता तिने साफ नकार दिला. त्यामुळे रणबीर कपूरमुळे निर्माण झालेला या दोघींमधील वाद अजूनही शमला नाही हे स्पष्ट झाले.
