खलिस्तानी दहशतवादी हरदीपसिंग निज्जरच्या हत्येप्रकरणी अटक करण्यात आलेल्या चार भारतीय नागरिकांना कॅनडाच्या न्यायालयाकडून दिलासा मिळाला आहे. 2023 च्या या प्रकरणात रॉयल कॅनेडियन माउंटेड पोलिसांनी करण बरार , कमलप्रीत सिंग, करणप्रीत सिंग आणि अमनदीप सिंग यांना अटक केली होती. आता या चौघांनाही सरे प्रांतिक न्यायालयातून जामीन मिळाला आहे. आता या चौघांविरुद्ध ब्रिटिश कोलंबिया सर्वोच्च न्यायालयात पुढील महिन्यात 11 फेब्रुवारीला सुनावणी होणार आहे.
ब्रिटिश कोलंबिया सरकारच्या न्याय विभागाच्या वेबसाईटवर चौघांच्या जामिनाची माहिती अपलोड करण्यात आली आहे. कागदपत्रात चार आरोपींच्या कोठडीच्या स्थितीसमोर 'एन' लिहिले आहे. करण बरार, कमलप्रीत सिंग, करणप्रीत सिंग आणि अमनदीप सिंग यांच्यावर फाईल क्रमांक 256562 अंतर्गत कारवाई करण्यात येत आहे. चौकशी केली असता चौघांवरही खुनाचा कट रचल्याचा आरोप असल्याचे निष्पन्न झाले.
निज्जर यांची सरे येथील गुरुद्वाराबाहेर गोळ्या झाडून हत्या करण्यात आली होती. या हत्याकांडात भारताचा हात असल्याचा आरोप कॅनडाचे पंतप्रधान जस्टिस ट्रूडो यांनी केला होता. मात्र, भारताने हे आरोप वारंवार फेटाळले आहेत.
