बॉलिवूडचा दबंग अभिनेता सलमान खान आणि मॉडेल लुलिया वंतूर यांच्या लग्नाची चर्चा सध्या चंदेरी दुनियेत धूमधडाक्यात सुरू आहे. अशा गुलाबी चर्चेला ऊत आला असताना लुलियाने इन्स्टाग्रामवर आपणास लग्नाची अद्याप घाई नसल्याचे म्हटले आहे. यामुळे सलमानच्या चाहत्यांना आपल्या या ‘बॉडीबिल्डर’च्या लग्नाचा बाजा तरी नेमका कधी वाजणार, याची उत्सुकता लागली आहे.
दोन दिवसांपूर्वी माध्यमांशी बोलताना सलमान खान याने ‘लग्नाचा विषय हा माझ्या कुटुंबाचा वैयक्तिक विषय आहे. तो मी सार्वजनिक करणे पसंत करत नाही. लग्नाबाबत योग्य वेळी मी फेसबुक आणि ट्विटर माहिती देईन. माझ्या चाहत्यांना कोणत्यावेळी बातमी द्यायची हे मला माहीत आहे, असे सलमानने स्पष्ट केले होते.
यानंतर आता लुलियाने इन्स्टाग्रामवर जे काही सांगितले आहे त्यावरून या दोघांच्या लग्नाची सनई इतक्यात वाजेल याची शक्यता कमी झाली आहे. लुलिया म्हणते की, मला लग्नाचा गाउन परिधान करण्याची इतक्यात घाई नाही. तसेच माझे यापूर्वी लग्न झालेले नाही.
