यवतमाळ:महाविकास आघाडी सरकारचा महत्वाची योजना असणाऱ्या शिवभोजन थाळी संदर्भात धक्कादायक प्रकार समोर आला आहे. राज्य सरकारने शिवथाळी भोजन गरीब नागरिकांसाठी सुरू केले. परंतु यवतमाळ जिल्ह्यातील एका केंद्रातील भयाण वास्तव समोर आले आहे. या केंद्रात ग्राहकांना दिली जाणारी थाळी शौचालयातील पाण्याने धुतली जात आहे. संबंधित शिवभोजन केंद्रावरील व्हिडीओ व्हायरल झाला आहे.
शिवभोजन केंद्रातील हा व्हिडीओ समोर आल्यानंतर चांगलीच खळबळ उडाली. विशेष म्हणजे हे शिवभोजन थाळी केंद्र राष्ट्रवादी काँग्रेसच्या महिला कार्यकर्तीचे असल्याचे वृत्त आहे. परंतु केंद्रात गलिच्छ जागेवर भांडी धुऊन त्याच थाळीत पुन्हा भोजन दिले जात असल्याने सरकार एक प्रकारे गरिबांची थट्टाच करत असल्याचे दिसून येत आहे.
