मिळालेल्या माहितीनुसार महाराष्ट्रातील सुप्रसिद्ध बांधकाम व्यावसायिक सुनील गणपतराव हेकरे यांचा भीषण रस्ते अपघातात मृत्यू झाला. मुंबईतील एका कौटुंबिक कार्यक्रमातून परतत असताना, समृद्धी महामार्गावर कसाराजवळ त्यांची मर्सिडीज कार अनियंत्रित झाली आणि उलटली. अपघातात त्यांचा जागीच मृत्यू झाला.
अपघात कसा झाला?
मिळालेल्या माहितीनुसार, मंगळवारी हेकरे कुटुंब मुंबईहून परतत होते. कसारा आणि आमने दरम्यान, बाजूने अचानक येणाऱ्या एका वेगवान वाहनामुळे महामार्गावर साचलेले पाणी सुनील हेकरे यांच्या कारच्या विंडशील्डवर उडाले. यामुळे गाडी चालवणाऱ्या त्यांच्या मुलाला काही क्षण काहीच दिसले नाही आणि गाडी नियंत्रणाबाहेर गेली आणि उलटली. या भीषण अपघातात सुनील हेकरे यांचा जागीच मृत्यू झाला, तर त्यांची पत्नी, दोन मुले जखमी झाले. त्यांना तातडीने जवळच्या रुग्णालयात नेण्यात आले. पोलिसांनी याप्रकरणी गुन्हा दाखल केला आहे आणि पुढील कारवाई सुरू आहे.
