Ajit Pawars group leader Nawab Maliks meeting : आर्थिक गैरव्यवहारप्रकरणी तुरुंगात असलेले राष्ट्रवादी काँग्रेसचे वरिष्ठ नेते नवाब मलिक यांची अखेर १७ महिन्यांनंतर दोन महिन्यांच्या जामिनावर सुटका झाली आहे. नवाब मलिक यांना चार दिवसांआधी जामीन मंजूर झाला आहे. प्रकृतीच्या कारणावरुन त्यांना जामीन देण्यात आला आहे. त्यांना जामीन मिळाल्यानंतर राष्ट्रवादीच्या अजित पवार गटातील नेत्यांनी नवाब मलिक यांची भेट घेतली आहे.
राष्ट्रवादी अजित पवार गटाचे प्रदेशाध्यक्ष सुनील तटकरे, खासदार प्रफुल्ल पटेल, अजित पवार गटाच्या महिला प्रदेशाध्यक्षा रूपाली चाकणकर, अजित पवार गटाच्या युवक राष्ट्रवादीचे प्रदेशाध्यक्ष सूरज चव्हाण यांच्यासह राष्ट्रवादीचे अन्य पदाधिकारी उपस्थित होते.
राजकीय विषयावर चर्चा केलेली नाही. 25-30 वर्षांपासून आम्ही एकत्र आहोत. माणुसकी म्हणून, मित्र म्हणून त्यांना भेटायला आलो. ही केवळ सदिच्छा भेट होती. राजकीय भेट नव्हती . दुसरा कुठलाही अर्थ काढू नका. त्यांची प्रकृती सुधारल्याशिवाय दुसरे कुठलेही काम त्यांनी करू नये, असंच आमचं म्हणणं आहे, असं प्रफुल्ल पटेल म्हणालेत.
