राज्यातील पालघर जिल्ह्यात विरारमधील जीवदानी मंदिरात जाणाऱ्या तीन भाविकांचा भीषण रस्ता अपघातात मृत्यू झाला. तर सात जण गंभीर जखमी झाले आहेत. जिल्ह्यातील जवाहर विक्रमगड रोडवरील वाळवंटा येथे हा अपघात झाला. नाशिक जिल्ह्यातील दिंडोरी येथील काही भाविक जीवदानी मातेचे दर्शन घेण्यासाठी जीपने विरारला येत होते. मात्र त्यांची जीप एका टेम्पोला धडकली.
मिळालेल्या माहितीनुसार, सोमवारी रात्री 7 वाजण्याच्या सुमारास हा अपघात झाला. या अपघातात गंगूबाई दशरथ कोरडे, निवृत्ती गणपत पायगे, सुंदराबाई निवृत्ती पायगे यांचा मृत्यू झाला. तर आणखी सात जण गंभीर जखमी झाले आहेत. जखमींवर रुग्णालयात उपचार सुरू आहेत.
पोलिसांनी दिलेल्या माहितीनुसार, नाशिक जिल्ह्यातील दिंडोरी येथील आंबेगण येथील काही भाविक विरार येथील जीवदानी मातेच्या दर्शनासाठी येत होते. मात्र वाळवंटा येथील डॉन बॉस्को शाळेसमोर त्यांच्या जीपला टेम्पोने जोरदार धडक दिली.
