वायनाड लोकसभा पोटनिवडणुकीसंदर्भात काँग्रेसच्या उमेदवार प्रियंका गांधी बुधवारी रोड शो करणार आहेत. त्यांच्या रोड शोमध्ये काँग्रेस आणि मित्रपक्ष आययूएमएलचा झेंडा दिसणार की नाही, अशी चर्चा आहे. वायनाडच्या राजकारणात झेंडा पुन्हा एकदा चर्चेत आला आहे. मात्र, रोड शोमध्ये काँग्रेस किंवा कोणत्याही मित्रपक्षाचा झेंडा दाखवण्यावर कोणतेही बंधन नसल्याचे काँग्रेस सूत्रांचे म्हणणे आहे.
दोन किमी लांबीच्या या रोड शोला बुधवारी सकाळी 11 वाजता काल्पट्टा येथील नवीन बसस्थानकापासून सुरुवात होणार आहे. यामध्ये प्रियांका गांधी यांच्यासह त्यांचे भाऊ आणि लोकसभेतील विरोधी पक्षनेते राहुल गांधी तसेच काँग्रेस शासित राज्यांच्या मुख्यमंत्र्यांचा समावेश असेल. रोड शोच्या समारोपाला प्रियंका गांधी यांच्या आई आणि काँग्रेस संसदीय समितीच्या अध्यक्षा सोनिया गांधी आणि काँग्रेस अध्यक्ष मल्लिकार्जुन खर्गे उपस्थित राहणार आहेत. यानंतर प्रियांका जिल्हाधिकारी कार्यालयात पोहोचून उमेदवारी अर्ज दाखल करणार आहेत.
2019 पासून वायनाडमध्ये काँग्रेस उमेदवारांच्या रोड शोमध्ये ध्वजावरून बरेच राजकारण झाले आहे. 2019 च्या लोकसभा निवडणुकीत काँग्रेस नेते राहुल गांधी यांच्या रोड शोमध्ये काँग्रेस आणि त्यांचा मित्रपक्षआययूएमएलचे हिरवे झेंडे ठळकपणे दिसून आले. याबाबत भाजप नेते आणि विद्यमान केंद्रीय गृहमंत्री अमित शहा म्हणाले होते की, हा रोड शो भारतात झाला की पाकिस्तानमध्ये हे समजणे कठीण आहे.
एप्रिल 2024 मध्ये लोकसभा निवडणुकीत काँग्रेसचे उमेदवार म्हणून राहुल गांधींनी रोड शो केला तेव्हा कोणत्याही पक्षाचा झेंडा दिसत नव्हता. याबाबत माकपने म्हटले होते की, काँग्रेसला भाजपची भीती वाटत आहे. दुसरीकडे, भाजपकडून असे सांगण्यात आले की, राहुल गांधींना आययूएमएलची लाज वाटली, त्यामुळे त्यांनी रोड शोदरम्यान पक्षाचा झेंडाही वापरला नाही.
