मिळालेल्या माहितीनुसार महाराष्ट्रातील मुंबईतून एक मोठी बातमी समोर आली आहे. पंतप्रधान नरेंद्र मोदी यांच्या परदेश दौऱ्यादरम्यान त्यांच्या विमानावर दहशतवादी हल्ल्याची धमकी देण्यात आली आहे. याबाबत मुंबई पोलिसांना फोन येताच एकच खळबळ उडाली. केंद्रीय आणि राज्य संस्था या प्रकरणाची चौकशी करत आहे. ११ फेब्रुवारी रोजी मुंबई पोलिसांच्या नियंत्रण कक्षाला एक फोन आला. पंतप्रधान नरेंद्र मोदी अधिकृत परदेश दौऱ्यावर असल्याने दहशतवादी त्यांच्या विमानावर हल्ला करू शकतात, असा इशारा फोन करणाऱ्याने मुंबई पोलिसांना दिला. ही माहिती गांभीर्याने घेत पोलिसांनी इतर एजन्सींना या प्रकरणाची माहिती दिली. पंतप्रधान मोदींच्या विमानावर दहशतवादी हल्ल्याची धमकी मिळाल्यानंतर सुरक्षा दलांच्या पथकांनी या प्रकरणाची चौकशी सुरू केली. फोन करणारी व्यक्ती कोण आहे हे शोधण्याचा प्रयत्न केला जात आहे. त्याला दहशतवादी हल्ल्याची माहिती कुठून मिळाली? एजन्सी आरोपीचा फोन ट्रेस करत आहे.
