भाईंदर पश्चिम येथील पंडित भीमसेन जोशी रुग्णालयाच्या आयसीयूमध्ये प्रशासकीय निष्काळजीपणाचे एक धक्कादायक प्रकरण उघडकीस आले आहे. आयसीयूमध्ये उपचार घेत असलेल्या ८९ वर्षीय वृद्ध महिलेच्या हाताला उंदराने चावा घेतल्याने तिच्या हातातून रक्तस्त्राव होत असल्याचा व्हिडिओ सोशल मीडियावर वेगाने व्हायरल होत आहे.कुटुंबीयांनी आरोप केला आहे की, आयसीयूमध्ये उपचार घेत असलेल्या ८९ वर्षीय महिलेचा उंदीर चावल्याने मृत्यू झाला
मृत महिला, सुहासिनी माठेकर (८९), यांना १२ मार्च रोजी भाईंदर पश्चिम येथील भारतरत्न पंडित भीमसेन जोशी रुग्णालयात दाखल करण्यात आले होते. त्यांची प्रकृती गंभीर असल्याने, रुग्णालयाच्या चौथ्या मजल्यावरील आयसीयूमध्ये त्यांच्यावर व्हेंटिलेटरवर उपचार सुरू होते. सर्वसामान्यांसाठी बंद असलेल्या आयसीयूमध्ये, व्हेंटिलेटरवर असहाय्यपणे पडून असलेल्या त्या वृद्ध महिलेचा हात उंदरांनी कुरतडला.
कुटुंबाचा आरोप आहे की, आयसीयूसारख्या संवेदनशील विभागात उंदरांची उपस्थिती ही रुग्णालयाची गंभीर निष्काळजीपणा दर्शवते . त्यांचे म्हणणे आहे की, जर या घटनेकडे वेळीच लक्ष दिले असते, तर अशी घटना घडली नसती. महिलेची मुलगी, मिलन माठेकर, हिचा आरोप आहे की, उंदीर चावल्यामुळे आणि त्यातून झालेल्या संसर्गामुळे तिच्या आईचा मृत्यू झाला आणि यासाठी रुग्णालय प्रशासन पूर्णपणे जबाबदार आहे.
ही घटना उघडकीस आल्यानंतर सोमवारी सकाळी रुग्णालयात मोठा गदारोळ झाला. महाराष्ट्र नवनिर्माण सेनेचे ओवळा-माजीवाडा विधानसभा अध्यक्ष सचिन पोकले, शहर अध्यक्ष संदीप राणे आणि शिवसेनेच्या (उद्धव बाळासाहेब ठाकरे) माजी नगरसेविका नीलम धवन यांनी रुग्णालयासमोर आंदोलन केले आणि घोषणाबाजी केली. मृताचे कुटुंबीय रुग्णालय प्रशासनाविरुद्ध पोलिसांत तक्रार दाखल करण्यावर ठाम आहेत.या प्रकरणाच्या चौकशीसाठी एक समिती स्थापन करण्यात आली आहे. दोषी आढळलेल्या कोणावरही कठोर कारवाई केली जाईल."
