मिळालेल्या माहितीनुसार रेल्वे मंत्री अश्विनी वैष्णव यांनी बुधवारी संसदेत सांगितले की, वापी आणि साबरमती दरम्यान मुंबई-अहमदाबाद हाय स्पीड रेल (MAHSR) प्रकल्पाचा गुजरात विभाग डिसेंबर २०२७ पर्यंत आणि संपूर्ण ५०८ किमी लांबीचा प्रकल्प डिसेंबर २०२९ पर्यंत पूर्ण होण्याची अपेक्षा आहे. तसेच केंद्रीय मंत्री म्हणाले की, बुलेट ट्रेन प्रकल्प खूप गुंतागुंतीचा आणि तांत्रिकदृष्ट्या गहन आहे. त्याच्या पूर्ण होण्याची नेमकी वेळ तेव्हाच कळू शकेल जेव्हा त्याच्याशी संबंधित सर्व बांधकाम कामे जसे की सिव्हिल स्ट्रक्चर, ट्रॅक, इलेक्ट्रिकल, सिग्नलिंग आणि टेलिकम्युनिकेशन आणि ट्रेनसेट्सचा पुरवठा पूर्ण होईल.
जापान सरकारच्या तांत्रिक आणि आर्थिक मदतीने MAHSR बांधले जात आहे. हा प्रकल्प गुजरात, महाराष्ट्र आणि दादरा आणि नगर हवेली या केंद्रशासित प्रदेशातून जात आहे. केंद्रीय मंत्र्यांनी सांगितले की, या प्रकल्पात मुंबई, ठाणे, विरार, बोईसर, वापी, बिलीमोरा, सुरत, भरूच, वडोदरा, आणंद, अहमदाबाद आणि साबरमती येथे १२ स्थानके बांधण्याची योजना आहे.
एमएएचएसआर प्रकल्पाचा एकूण अंदाजे खर्च सुमारे १,०८,००० कोटी रुपये आहे, त्यापैकी ८१ टक्के म्हणजे ८८,००० कोटी रुपये जपान इंटरनॅशनल कॉर्पोरेशन एजन्सी (जिका) द्वारे निधी दिला जात आहे. तर उर्वरित १९ टक्के म्हणजे २०,००० कोटी रुपये रेल्वे मंत्रालय (५० टक्के) आणि महाराष्ट्र आणि गुजरात राज्य सरकार (प्रत्येकी २५ टक्के) यांच्या इक्विटी योगदानातून निधी दिला जाईल.
