प्रभु! जन्म सफल हा व्हावा

मम जीवनतरु फुलवावा ॥ प्रभु.... ॥

सत्संगतिसलिला देई

सद्विचार रविकर देई

वैराग्य बंधना लावी

हे रोप वाढिला लावा ॥ मम.... ॥

तू विकार वादळि पाळी

मोहाचे कृमि तू जाळी

श्रद्धेचे खत तू घाली   

टवटवित हरित शोभावा ॥ मम.... ॥

धैर्याचा गाभा भरु दे

प्रेमाचे पल्लव फुटु दे

सत्कर्मसुमांनी नटु दे

सच्छील-सुरभि पसरावा ॥ मम.... ॥

गुंगोत भक्तिचे भृंग

नांदोत ज्ञान-विहंग

कूजना करुत नवरंग

शांतिच्या फळी बहरावा ॥ मम.... ॥

बंधूंस सावली देवो

बंधूंस सौख्यरस देवो

सेवेत सुकोनी जावो

हा हेतु विमल पुरवावा ॥ मम.... ॥

-धुळे तुरुंग, मे १९३२

रचनाकार: पांडुरंग सदाशिव साने