पाकिस्तान सुपर लीग (पीएसएल) दरम्यान एक धक्कादायक बातमी समोर आली आहे. ऑस्ट्रेलियाचा दिग्गज फलंदाज डेव्हिड वॉर्नर एका कायदेशीर वादात अडकला आहे. वृत्तानुसार, वॉर्नरवर मद्यपान करून गाडी चालवल्याचा आरोप आहे आणि पोलिसांनी त्याला अटक केली होती. मात्र, नंतर त्याची सुटका करण्यात आली.
ऑस्ट्रेलियाचा हा माजी सलामीवीर सध्या पाकिस्तान सुपर लीग (पीएसएल) २०२६ मध्ये कराची किंग्सचे कर्णधारपद भूषवत आहे. पीएसएलमधील त्याच्या फ्रँचायझीच्या सामन्यांमध्ये काही दिवसांचे अंतर होते, त्यामुळे तो आपल्या कुटुंबासोबत वेळ घालवण्यासाठी ऑस्ट्रेलियाला गेला होता. news.com.au च्या वृत्तानुसार, डेव्हिड वॉर्नरवर मद्यपान करून गाडी चालवल्याचा आरोप ठेवण्यात आला आहे. असे वृत्त आहे की, ५ एप्रिलच्या रात्री सिडनीच्या मारुब्रा परिसरात पोलिसांनी केलेल्या श्वास चाचणीत त्याच्या शरीरातील अल्कोहोलची पातळी कायदेशीर मर्यादेपेक्षा जवळपास दुप्पट आढळली.
पोलिसांच्या अधिकृत निवेदनात म्हटले आहे: "५ एप्रिल रोजी, सायंकाळी अंदाजे ५:३० वाजता, पोलीस मारुब्रा येथील मलबार रोडवर यादृच्छिक श्वास तपासणी करत होते. तपासणी स्थळापूर्वी एक वाहन थांबून पार्क केलेले दिसले. अधिकाऱ्यांनी चालकाची तपासणी केली, ज्यात तो पॉझिटिव्ह आढळला. त्यानंतर त्याला अटक करून पोलीस ठाण्यात नेण्यात आले, जिथे दुसऱ्या चाचणीत त्याचे प्रमाण ०.१०४ आढळले. त्या व्यक्तीला ७ मे, २०२६ रोजी डाउनिंग सेंटर स्थानिक न्यायालयात हजर राहण्याची नोटीस बजावण्यात आली आहे."
