'बिग बॉस 16'मध्ये दिसणारा साजिद खानवरील आरोपांची मालिका संपण्याचे नाव घेत नाही आहे. शर्लिन चोप्रा, आहाना कुमार, मंदाना करीमी यांच्यानंतर आता मराठी अभिनेत्री जयश्री गायकवाडने साजिद खानवर लैंगिक छळाचा आरोप केला आहे. अभिनेत्रीने एक व्हिडीओ शेअर करत आपला अनुभव शेअर केला आहे. जेव्हा ती कामासाठी साजिद खानला भेटायला गेली तेव्हा तिच्यासोबत गैरवर्तन करण्यात आल्याचा आरोप अभिनेत्रीने केला आहे.
मराठी अभिनेत्री जयश्री गायकवाड हिने व्हिडिओ शेअर करत म्हटले आहे की, 'मी बऱ्याच दिवसांपासून मराठी आणि हिंदी चित्रपटसृष्टीत काम करत आहे. आठ वर्षांपूर्वी एका कास्टिंग डायरेक्टरने माझी साजिद खानसोबत एका पार्टीत ओळख करून दिली, त्यानंतर मी खूप खूश होते. त्याने मला सांगितले की उद्या तू ऑफिसला ये, मी एक चित्रपट करतोय त्यामुळे तुझ्यासाठी काहीतरी बाहेर येईल.
पुढे अभिनेत्री म्हणाली, 'मी गेले तेव्हा तो ऑफिसमध्ये एकटाच होता. तो मला इकडे तिकडे स्पर्श करू लागला, घाणेरड्या कमेंट करू लागला. मला म्हणाला की तू खूप सुंदर आहेस, पण मी तुला काम का देऊ? मी म्हणाले काय पाहिजे सर, मी चांगला अभिनय करते. तो म्हणाला की अभिनय चालत नाही. मी जे सांगेन, जे सांगेन ते तुला करावे लागेल. हे ऐकून मला खूप राग आला आणि मी तिथून निघाले.
