Nana Patole News: महाराष्ट्र विधानसभा निवडणुकीनंतर मतदान प्रक्रियेबाबत अनेक प्रश्न उपस्थित केले जात आहे. तसेच काँग्रेस प्रदेशाध्यक्ष नाना पटोले यांनी मतदानाच्या टक्केवारीबाबत गंभीर प्रश्न उपस्थित केला आहे. मतदानाच्या टक्केवारीत मोठी तफावत असल्याचे त्यांचे म्हणणे असून जे संशयास्पद आहे. मतदान केंद्राचा व्हिडिओ शेअर करण्याची मागणी नाना पटोले यांनी निवडणूक आयोगाकडे केली आहे. मुंबईतील टिळक भवनात काँग्रेसने आयोजित केलेल्या पत्रकार परिषदेत नाना पटोले यांनी या विषयावर भाष्य केले.
नाना पटोले यांनी मतदानाची टक्केवारी वाढलेल्या मतदान केंद्राचे सीसीटीव्ही फुटेज जनतेला देण्याची मागणी निवडणूक आयोगाकडे केली आहे. पटोले यांनी निवडणूक आयोगावरही मतांची हेराफेरी केल्याचा गंभीर आरोप केला आहे. गेल्या आठवड्यातच हाती आलेले महाराष्ट्र विधानसभा निवडणुकीचे निकाल महाविकास आघाडीसाठी धक्कादायक होते. या निवडणुकीत महाविकास आघाडीच्या निवडून आलेल्या आमदारांना पन्नाशीचा आकडाही गाठता आला नाही. या पराभवाचे सर्व खापर ईव्हीएमवर टाकत आता याविरोधात आंदोलन करण्याचा निर्णय घेतला आहे.
