नात्यांची अनोखी धोबीपछाड असं कथासूत्र असणार्‍या ‘हुतूतू’ या आगामी सिनेमाचं म्युझिक लाँच नुकतंच कलाकार आणि तंत्रज्ञांच्या उपस्थितीत झालं. प्रसिद्ध अभिनेते अशोक सराफ आणि अभिनेत्री वर्षा उसगावकर ही लोकप्रिय जोडी या विनोदी सिनेमात दीर्घकाळानंतर एकत्र दिसणार आहे.
सिनेमात जितेंद्र जोशी, हेमंत ढोमे, नेहा पेंडसे, मानसी नाईक, अनंत जोग, प्रदीप पटवर्धन, जयवंत भालेकर, अतुल तोडणकर, संजय खापरे आणि कांचन अधिकारी अशी कलावंतांची तगडी फौज या सिनेमासाठी एकत्र आली आहे. त्याग आणि समर्पणाला प्रेम मानणारी जुनी पिढी आणि प्रेम मिळवण्यासाठी प्रयत्नांची पराकाष्ठा करणारी नवी पिढी यांच्यातला संघर्ष या सिनेमात पाहायला मिळणार आहे.
प्रकाश राणे यांनी लिहिलेल्या गाण्यांना आनंद राज आनंद यांनी संगीत दिलं आहे. ‘हुतूतू’ या शीर्षक गीतासह, ‘लाडीगोडी’ आणि ‘लैला मेरी लैला’ अशी तीन गाणी सिनेमात आहेत. संगीतकार आनंद राज आनंद यांचे संगीत असलेल्या लोकप्रिय हिंदी गाण्यांचा आस्वादही प्रेक्षकांना या सिनेमात घेता येणार आहे. हर्षवर्धन भोईर आणि भाऊसाहेब भोईर यांनी या सिनेमाची निर्मिती केली आहे.
