चेन्नई सुपर किंग्जचा (CSK) माजी कर्णधार महेंद्रसिंग धोनीने वानखेडेवर मुंबई इंडियन्सविरुद्ध खेळल्या जाणाऱ्या सामन्यात प्रवेश करताच एक विशेष कामगिरी आपल्या नावावर केली. टी-20 इतिहासातील कोणत्याही एका संघासाठी धोनीचा हा 250 वा सामना होता. भारतीय क्रिकेटच्या इतिहासातील महान खेळाडूंपैकी एक असलेल्या धोनीने या बाबतीत रॉयल चॅलेंजर्स बंगळुरू (RCB)चा माजी कर्णधार विराट कोहलीची बरोबरी केली आहे. कोहली नुकताच आरसीबीसाठी 250 सामने खेळणारा खेळाडू बनला आहे. या दोन खेळाडूंशिवाय आतापर्यंत कोणालाही ही कामगिरी करता आलेली नाही.
धोनी हा आयपीएलचा सर्वात यशस्वी कर्णधार आहे . धोनीच्या नेतृत्वाखाली चेन्नई सुपर किंग्जने पाच वेळा आयपीएलचे विजेतेपद पटकावले आहे. धोनीच्या नेतृत्वाखाली CSK संघाने 2010, 2011, 2018, 2021 आणि 2023 मध्ये विजय मिळवला आहे. आयपीएलमध्ये पाच हजार धावा पूर्ण करणारा धोनी सीएसकेचा दुसरा खेळाडू ठरला आहे. धोनीने चेन्नईसाठी आतापर्यंत 250 सामन्यांमध्ये 5016 धावा केल्या आहेत. या काळात त्याच्या बॅटमधून 23 अर्धशतके झाली आहेत. धोनीपूर्वी संघाचा माजी अष्टपैलू सुरेश रैना हा एकमेव खेळाडू होता ज्याने सीएसकेसाठी पाच हजार धावा पूर्ण केल्या होत्या. रैनाने सीएसकेसाठी 200 सामन्यांमध्ये 5529 धावा केल्या आहेत.
