बहुचर्चित आणि बहुप्रतिक्षित चित्रपट ‘पद्मावत’ अखेर २५ जानेवारीला हा चित्रपट प्रेक्षकांच्या भेटीला येणार आहे. सेन्सॉर बोर्डाच्या निर्देशांनुसार चित्रपटाचे ‘पद्मावती’ हे नाव बदलून ‘पद्मावत’ असे ठेवण्यात आले आहे. यु/ ए प्रमाणपत्र देत सेन्सॉरने प्रदर्शनाची वाट मोकळी केली आहे. दुसरीकडे याच दिवशी अक्षय कुमारचा ‘पॅडमॅन’ हा चित्रपट प्रदर्शित होत असल्याने या दोन बहुचर्चित चित्रपटांमध्ये चांगलीच टक्कर होणार आहे.
१८० कोटींचा बजेट असलेल्या भन्साळी यांच्या चित्रपटाला सुरुवातीपासूनच राजपूत संघटनांकडून तीव्र विरोध होत आहे. इतिहासाची मोडतोड करून चित्रपट निर्मिती केल्याचा आरोप राजपूत करणी सेनेने केला आहे. त्यानंतर देशभरात ठिकठिकाणी याविरोधात आंदोलने, निदर्शनेदेखील झाली होती. सेन्सॉर बोर्डाने अखेर हा तिढा सोडवण्यासाठी इतिहासकार आणि राजघराण्याच्या उत्तराधिकाऱ्यांची सहा सदस्यीय समिती नेमली. या समितीने काही बदल सुचवले. आता चित्रपट रिलीज होत आहे.
