अभिनेत्री श्‍वेता तिवारी हिने तिचा पती अभिनव कोहलीविरोधात मुलीचा विनयभंग आणि कौटुंबिक हिंसाचाराचा आरोप केला आहे. दरम्यान, श्‍वेता तिवारीच्या आरोपानंतर पोलिसांनी या प्रकरणी अभिनव कोहलीला अटक केली आहे. अभिनव सतत दारुच्या नशेत राहतो आणि आपल्या मुलीला शिवीगाळ करत मारहाण करतो असे श्‍वेताने आपल्या आरोपात म्हटले आहे. दरम्यान, अभिनव कोहलीला श्‍वेताच्या तक्रारीनंतर अटक करण्यात आली आहे.
मुंबईतील समतानगर पोलिस स्टेशनमध्ये अभिनवला रविवारी रात्री आणण्यात आले होते. त्यावेळी त्याची श्‍वेता आणि तिची मुलगी पलक हिच्यासमोर तब्बल चार तास चौकशी सुरू होती त्यानंतर श्‍वेता तिवारी हिच्या तक्रारीनंतर अभिनवला अटक करण्यात आली आहे. श्‍वेताच्या म्हणण्यानुसार अभिनव सतत आपल्या मुलीसोबत गैरवर्तणूक करत तिला मारहाण करत होता. तसेच त्याने आपल्या 18 वर्षीय मुलीला त्याच्या मोबाईलमधील मॉडेलचा अश्‍लील फोटोदेखील दाखवल्याचा आरोप श्‍वेताने केला आहे. दरम्यान, अभिनवने आपल्या मुलीवर हात उचलल्यामुळे तिने पोलिसांत तक्रार दाखल केली असल्याचे सांगण्यात येत आहे. श्‍वेता तिवारी कौटुंबिक हिंसाचाराची दुसऱ्यांदा बळी पडली आहे. तिचा पहिला पति राजा चौधरी यानेदेखील श्‍वेताचा कौटुंबिक छळ केला होता त्यानंतर त्या दोघांचा घटस्फोट झाला होता.
