India Tourism : लग्नानंतरअनेक लोक आपल्या जोडीदारासोबत पहिल्यांदाच हनिमूनचे नियोजन करत असतील. तसेच लग्न झाल्यावर, प्रत्येक जोडप्याची इच्छा असते की त्यांनी आपले नवीन आयुष्य अशा ठिकाणी सुरू करावे, जे केवळ रोमँटिकच नाही, तर त्यांच्या आठवणींमध्ये कायमचे कोरले जाईल. एप्रिल आणि मे महिन्यांत भारतात मैदानी प्रदेशात प्रचंड उष्णता असते, त्यामुळे तुमच्या हनिमूनसाठी थंड आणि शांत दऱ्या निवडणे हा एक चांगला पर्याय असू शकतो.भारतात अनेक अपरिचित आणि उत्कृष्ट थंड हवेची ठिकाणे आहे, जिथे या हंगामात आल्हाददायक हवामान असते आणि पर्यटकांची प्रचंड गर्दी टाळता येते.
चोपटा आणि औली
उत्तराखंडमधील चोपटा एप्रिल-मे महिन्यात रोडोडेंड्रॉनच्या फुलांनी बहरलेले असते, ज्यामुळे ते अत्यंत रोमँटिक बनते. येथून दिसणारे हिमालयीन शिखरांचे दृश्य आणि तुंगनाथ मंदिरापर्यंतचा छोटा ट्रेक तुमच्या सहलीचा रोमांच वाढवतात. तसेच जवळचे औली थंड वाऱ्यासाठी आणि रोपवेसाठी प्रसिद्ध आहे. निसर्गाच्या कुशीत एकांत शोधणाऱ्या जोडप्यांसाठी हे ठिकाण एक स्वर्ग आहे.
मनाली आणि डलहौसी
जर तुम्हाला बर्फ आणि हिरवळीचा संगम अनुभवायचा असेल, तर हिमाचल प्रदेशातील मनाली आणि दालहौसीपेक्षा उत्तम ठिकाण नाही. रोहतांग पासवरील बर्फ आणि सोलांग व्हॅलीमधील पॅराग्लायडिंग तुमच्या हनिमूनमध्ये रोमांच वाढवेल. तसेच डलहौसीमधील व्हिक्टोरियन-शैलीतील इमारती आणि खज्जियारचे (मिनी स्वित्झर्लंड) मैदानी प्रदेश, फोटोग्राफीची आवड असणाऱ्या जोडप्यांसाठी एक अद्भुत पार्श्वभूमी तयार करतात.
मुन्नार आणि वायनाड
जर तुम्ही दक्षिण भारतात प्रवास करण्याचा विचार करत असाल, तर केरळमधील मुन्नार आणि वायनाडच्या टेकड्या एक चांगला पर्याय आहे. चहाच्या मळ्यांमध्ये वसलेले रिसॉर्ट्स आणि वायनाडमधील ट्री-हाऊसमध्ये राहण्याचा अनुभव तुमचा अनुभव खरोखरच रोमांचक बनवेल. एप्रिलमधील हलका पाऊस आणि धुक्याच्या सकाळमुळे वातावरण अधिकच रोमँटिक आणि आल्हाददायक बनते.
