जबलपूर : पाठीमागून आलेल्या एका खासगी टँकरने सैन्य दलाच्या गाडीला जोरदार धडक दिल्याने या अपघातात एका जवानाचा मृत्यू झाला असून एक गंभीर जखमी झाल्याची घटना घडली आहे. जबलपूरहून बंगळूरूला जाणाऱ्या सैन्य दलाच्या गाडीला हा भीषण अपघात झाला आहे. या अपघातात सांगलीच्या एका जवानाचा मृत्यू झाला आहे. अपघाताची माहिती मिळताच संपूर्ण कुटुंबावर शोककळा पसरली आहे.
याबाबत मिळालेल्या माहितीनुसार, सांगली जिल्ह्यातील लोणारवाडी गावचे सुपुत्र आणि पॅरा कमांडोचे हवालदार पोपट भगवान खोत यांचा या अपघातात मृत्यू झाला आहे. तर त्यांचा सहकारी एक जवान गंभीर जखमी आहे. आज दुपारी बारा वाजण्याच्या सुमारास जबलपूर जवळ हा अपघात झाला.
पोपट खोत हे 34 वर्ष वयाचे होते. त्यांच्या पश्चात पत्नी, मुलगा, मुलगी, आई आणि बहिणी असा परिवार आहे. पोपट खोत यांचं पार्थिव त्यांच्या गावी लोणारवाडी येथे आणलं जात आहे. कर्त्यव्य बजावत असताना, पोपट खोत यांचा अपघाती मृत्यू झाला असून, त्यांच्या पार्थिवावर शासकीय इतमामात अंत्यसंस्कार केले जाणार आहेत. पोपट खोत यांचे पार्थिव त्यांच्या मुळगावी आणण्यात येणार आहे. निधनाच्या बातमीने परिवारावर दु:खाचा डोंगर कोसळला आहे. मृत्यूची माहिती मिळताच आईचा आणि पत्नीचा आक्रोश हृदय पिळवटणार आक्रोश होता.
